बाप्पा क्रिडा महोत्सव 2023

 

बाप्पा क्रिडा महोत्सव

       मुलांना गणपतीचं सर्वांत जास्त आकर्षण असतं.त्यांचा गणेशोत्सवात असो कि इतर काळात तो दोस्तच..!

"आपल्या शाळेत गणपती बसवायचा हं.."

या हाकेला साद देत मोठ्या थाटात गणराज शाळेत विराजमान झालेत.आता हा सहशालेय उपक्रम कसा होईल यानिमित्ताने ठरला क्रिडा महोत्सव.यात चित्रकला स्पर्धा,लिंबू चमचा स्पर्धा,गोणपाट स्पर्धा,चेंडू बादलीत टाकणे,पट्टी बांधून बॉलला मारणे,संगीत खुर्ची असे एक ना अनेक खेळ घेण्यात आलेत.मुलांचा आवडीचा खेळ घेतला म्हणजे खेळाचा दर्जा वाढतो अन् त्यातून मिळणारा आनंद,कौशल्य मुलांचा आत्मविश्वास वाढवितात..!

चेंडू बादलीत टाकणे या स्पर्धेत पहिलीच्या भूषणने अंतरावरून तीन चेंडू बादलीत टाकले.कौतुकास पात्र ठरला नि त्याने जिंकल्याची खूण म्हणून वर केलेली तीन बोटं त्याच्या जिंकण्याचं महत्त्व अधोरेखित करत होते.

     मुलांना खेळ मनापासून आवडतो.त्यात ते आनंदाने सहभागी होतात.यात जिंकलेल्या स्पर्धकांना बक्षीस म्हणजे मजाच की..!

नाचणं,गाणं,मजा मस्ती...!

सारं सोबतीला असतांना पोरं म्हणालीच की दणक्यात..!

"आमच्या सरांनी गम्पती आणला..." ❤️

प्रेरक आहात..!

प्रेरणा द्या,प्रेरणा घ्या..!

@गिरीजादूत

मातीतलं जगणं

 

☃💦🎲🏡📱🎉🌑🌳🌸🎯🌀

 मातीतलं जगणं

        परिसरात असलेली माती.तिचा चिखल बनवून,हव्या त्या मित्र मैत्रीणींसोबत,आपापल्या हवं ते बनवण्याचं स्वातंत्र्य मिळालंय याची जाणीव झाली कि तयार होतात मग मनापासून मातीच्या वस्तू.

         मातीपासून बैल बनविणे कार्यशाळा संपन्न झाली.यात मुलांनी बैलांसोबत मातीपासून ग्रामीण संस्कृतीशी संबंधित अनेक वस्तू बनवल्या.यात कपबशी,तबकडी,ताट,पोळपाटले,लाटणे,खलबत्ता,खुर्ची,टेबल,घर,बैलगाडे,पलंग,चुल्हा,मोबाईल,गणपती,महादेव पिंड अशा एक ना अनेक बाबी आपल्या कल्पकतेने मुलांनी तयार केल्यात.सोबतीला बैलपोळा कविता अन् संगीत असल्याने मुलांनी आनंदाने या वस्तू तयार केल्यात.

        मातीतं शिक्षण हे कलेचं शिक्षण असतं.निसर्ग आपल्याला भरभरून देत असतो.फक्त त्याचा उपयोग ज्या त्या वेळी करणं गरजेचं.मातीत रूजवलेलं पूर्ण  ताकदनिशी उगवतं,त्यास मातीही साथ देत असते.माती हा घटक घेऊन अनेक संबोध अभ्यासता आलेत.विद्यार्थ्यांच्या कल्पनांना उडू दिलं की जमतं.कोणाच्या डोक्यातून काय येईल काही सांगता येत नाही.सर्जनशील अन् चिकत्सक विद्यार्थी हे अशा छोट्या उपक्रमातूनच आपल्या भन्नाट कल्पनांना मोकळीक देत असतात.मातीचा चिखल करणं अन् त्यातून नवनिर्मिती करणं सोपं होऊन जातं,जेव्हा चिमुकल्यांनी तयार केलेलं सारं स्विकारलं जातं तेव्हा.कलेतून शिक्षण दिलं की आवडीचं म्हणून विद्यार्थीही प्रतिसाद देत असतात.आपण राबविलेला छोटासा उपक्रम यातूनच लेकरांचं   शालेय सामाजिकीकरण होत असतं.जवळीकता अन् मदतीची भावना निर्माण होण्यास हे उपक्रम मदत करीत असतात.म्हणूनच मातीच्या मदतीतून दिलेलं आजचं कलेचं शिक्षण महत्त्वाचे होतेच.हे मातीतलं जगणं कळण्यासाठी हाताला मातीचा स्पर्श होणं गरजेचं असत़ं.

        मुलांच्या हातांमध्ये असलेली जादू अनुभवण्यासाठी हे उपक्रम खास असतात.मुलांच्या चेहऱ्यावर असलेला आनंद टिपण्यासाठी हे 'मातीतलं जगणं' महत्त्वाचे वाटते.

प्रेरक आहात..!

प्रेरणा द्या,प्रेरणा घ्या

@गिरीजादूत

☃💦🎲🏡📱🎉🌑🌳🌸🎯🌀

आपल्यातला अर्जून

 

आपल्यातला अर्जून

"सर,मै बी येऊ का पोऱ्यासले बलावाले" 

       आपला एक हात डोक्याला बांधलेल्या रुमालाला लावत धाडसानं बोलणारं लेकरू ते अर्जून आहे हे त्याच्याशी बोलल्यावर कळालं.

      शनिवार दप्तरमुक्त असला म्हणजे झुंबा होणारच.शनिवारची सकाळ म्हणजे पालक विद्यार्थी गृहभेट ठरलेली.अर्जून नेहमीच सोबतीला असतो.नवनवीन खेळ घेतांना त्याच्यातल्या 'अर्जूनाला' ओळखून घेत होतो.झुंबा मध्ये येणारे शारीरिक व्यायाम,त्यात आपल्या भाषेतील गाणं असलं की पोरं देतात प्रतिसाद मनापासून अगदी..."दिल से" अन् यातून गवसला "आपल्यातला अर्जून".

      अर्जूनशी संवाद वाढल्याने पोरंग आपले कलागुण दाखवू लागला.त्यात सर्वांनी केलेलं कौतुक तर नवी ऊर्जा भरतं अंगात.अर्जूनला येत असलेल्या बाबी टप्प्याटप्प्याने आम्ही जाणून घेत गेलो.त्याची शारीरिक लवचिकता तर भन्नाटच.हातात आलेली रिंग तर सहजच हातापायांशी खेळत तो फिरवतो.विविध प्रकारच्या उड्या,खेकडा चाल,साहित्यासह शारीरिक कृती करून दाखवत आपले लक्ष वेधून घेतो.

        अर्जून शांत,संयमी लेकरू.त्याला विद्यार्थ्यांमधील व्यासपीठ मिळालं.झालेलं कौतुक यामुळे तो बिनधास्त व्यक्त होतोय.आपल्यातलं कौशल्य सादर करतोय.सादला प्रतिसाद देतोय अगदी बिनधास्त.हे होतंय फक्त एकमेकांवरील विश्वासू संवादामुळे.विशेष म्हणजे अशी लेकरं भेटत आहेत सातत्याने होत असलेल्या नाविन्यपूर्ण उपक्रमांमुळेच..!

       शारीरिक शिक्षणाचं महत्त्व हे शालेय शिक्षणात महत्त्वाचे आहे.अर्जून नावाप्रमाणेच 'अर्जून' आहे.विविध कलागुणांनी भरलेला हा सखा प्रत्येक भेटीत नव्या रुपात भेटतो.'आपल्यातला अर्जून' जागा करतो.आपल्यातल्या बालमनाला बालपणाच्या हिंदोळ्यावर खेळ खेळायला लावतो.सुख दुःखाचे क्षण वेचायला भाग पाडतो.मुलं मुलांपासून शिकतात हे जेवढं खरं तेवढंच आपणही त्यांच्यापासून बरंच शिकत असतो हे ही सत्यच आहे.

       'आपल्यातला अर्जून' हा नेहमीच आपल्यात डोकावत असतो.कधीकधी होऊन जाऊयात 'अर्जून'. अर्जूनाशी संवाद साधल्याने त्याच्यातलं नाविन्यपूर्ण कौशल्य बघायला नि अनुभवायला येतंय.इतर मुलं शिकत आहेत अन् आम्हीही...!

चला तर मग शोधूयात 'आपल्यातल्या अर्जूनाला'...!

प्रेरक आहात..!

प्रेरणा द्या,प्रेरणा घ्या..!

@गिरीजादूत 

9665911657

दहिहंडी महोत्सव,उंबरधे

 दंगा,मस्ती,गाणे,नृत्य सारेच सारे... 

आनंददायी शिक्षण ... !