मुखपृष्ठ

Tuesday, September 26, 2023

बाप्पा क्रिडा महोत्सव 2023

 


बाप्पा क्रिडा महोत्सव

       मुलांना गणपतीचं सर्वांत जास्त आकर्षण असतं.त्यांचा गणेशोत्सवात असो कि इतर काळात तो दोस्तच..!

"आपल्या शाळेत गणपती बसवायचा हं.."

या हाकेला साद देत मोठ्या थाटात गणराज शाळेत विराजमान झालेत.आता हा सहशालेय उपक्रम कसा होईल यानिमित्ताने ठरला क्रिडा महोत्सव.यात चित्रकला स्पर्धा,लिंबू चमचा स्पर्धा,गोणपाट स्पर्धा,चेंडू बादलीत टाकणे,पट्टी बांधून बॉलला मारणे,संगीत खुर्ची असे एक ना अनेक खेळ घेण्यात आलेत.मुलांचा आवडीचा खेळ घेतला म्हणजे खेळाचा दर्जा वाढतो अन् त्यातून मिळणारा आनंद,कौशल्य मुलांचा आत्मविश्वास वाढवितात..!

चेंडू बादलीत टाकणे या स्पर्धेत पहिलीच्या भूषणने अंतरावरून तीन चेंडू बादलीत टाकले.कौतुकास पात्र ठरला नि त्याने जिंकल्याची खूण म्हणून वर केलेली तीन बोटं त्याच्या जिंकण्याचं महत्त्व अधोरेखित करत होते.

     मुलांना खेळ मनापासून आवडतो.त्यात ते आनंदाने सहभागी होतात.यात जिंकलेल्या स्पर्धकांना बक्षीस म्हणजे मजाच की..!

नाचणं,गाणं,मजा मस्ती...!

सारं सोबतीला असतांना पोरं म्हणालीच की दणक्यात..!

"आमच्या सरांनी गम्पती आणला..." ❤️

प्रेरक आहात..!

प्रेरणा द्या,प्रेरणा घ्या..!

@गिरीजादूत



















Saturday, September 9, 2023

आपल्यातला अर्जून

 


आपल्यातला अर्जून

"सर,मै बी येऊ का पोऱ्यासले बलावाले" 

       आपला एक हात डोक्याला बांधलेल्या रुमालाला लावत धाडसानं बोलणारं लेकरू ते अर्जून आहे हे त्याच्याशी बोलल्यावर कळालं.

      शनिवार दप्तरमुक्त असला म्हणजे झुंबा होणारच.शनिवारची सकाळ म्हणजे पालक विद्यार्थी गृहभेट ठरलेली.अर्जून नेहमीच सोबतीला असतो.नवनवीन खेळ घेतांना त्याच्यातल्या 'अर्जूनाला' ओळखून घेत होतो.झुंबा मध्ये येणारे शारीरिक व्यायाम,त्यात आपल्या भाषेतील गाणं असलं की पोरं देतात प्रतिसाद मनापासून अगदी..."दिल से" अन् यातून गवसला "आपल्यातला अर्जून".

      अर्जूनशी संवाद वाढल्याने पोरंग आपले कलागुण दाखवू लागला.त्यात सर्वांनी केलेलं कौतुक तर नवी ऊर्जा भरतं अंगात.अर्जूनला येत असलेल्या बाबी टप्प्याटप्प्याने आम्ही जाणून घेत गेलो.त्याची शारीरिक लवचिकता तर भन्नाटच.हातात आलेली रिंग तर सहजच हातापायांशी खेळत तो फिरवतो.विविध प्रकारच्या उड्या,खेकडा चाल,साहित्यासह शारीरिक कृती करून दाखवत आपले लक्ष वेधून घेतो.

        अर्जून शांत,संयमी लेकरू.त्याला विद्यार्थ्यांमधील व्यासपीठ मिळालं.झालेलं कौतुक यामुळे तो बिनधास्त व्यक्त होतोय.आपल्यातलं कौशल्य सादर करतोय.सादला प्रतिसाद देतोय अगदी बिनधास्त.हे होतंय फक्त एकमेकांवरील विश्वासू संवादामुळे.विशेष म्हणजे अशी लेकरं भेटत आहेत सातत्याने होत असलेल्या नाविन्यपूर्ण उपक्रमांमुळेच..!

       शारीरिक शिक्षणाचं महत्त्व हे शालेय शिक्षणात महत्त्वाचे आहे.अर्जून नावाप्रमाणेच 'अर्जून' आहे.विविध कलागुणांनी भरलेला हा सखा प्रत्येक भेटीत नव्या रुपात भेटतो.'आपल्यातला अर्जून' जागा करतो.आपल्यातल्या बालमनाला बालपणाच्या हिंदोळ्यावर खेळ खेळायला लावतो.सुख दुःखाचे क्षण वेचायला भाग पाडतो.मुलं मुलांपासून शिकतात हे जेवढं खरं तेवढंच आपणही त्यांच्यापासून बरंच शिकत असतो हे ही सत्यच आहे.

       'आपल्यातला अर्जून' हा नेहमीच आपल्यात डोकावत असतो.कधीकधी होऊन जाऊयात 'अर्जून'. अर्जूनाशी संवाद साधल्याने त्याच्यातलं नाविन्यपूर्ण कौशल्य बघायला नि अनुभवायला येतंय.इतर मुलं शिकत आहेत अन् आम्हीही...!

चला तर मग शोधूयात 'आपल्यातल्या अर्जूनाला'...!

प्रेरक आहात..!

प्रेरणा द्या,प्रेरणा घ्या..!

@गिरीजादूत 

9665911657



Thursday, September 7, 2023

दहिहंडी महोत्सव,उंबरधे

 दंगा,मस्ती,गाणे,नृत्य सारेच सारे... 

आनंददायी शिक्षण ... !











Wednesday, August 23, 2023

गोष्ट वाचन : आव्हान



गोष्ट वाचन : आव्हान

      'वाचकांची शाळा' हा उपक्रम हाती घेतल्यानंतर शाळेत उपलब्ध असलेली ग्रंथालयातील पुस्तके सहज उपलब्ध होत असतात.विद्यार्थ्यांमध्ये वाचनाची आवड निर्माण व्हावी यासाठी छोटे छोटे वाचन गोडी वाढवणारे प्रयोग सध्या शाळेत सुरू आहेत.

         मुलांना 'नवे ते हवे असते' म्हणूनच 'वाचकांची शाळा' या उपक्रमासाठी मुलांना नवनवे पुस्तके शाळेत उपलब्ध व्हावीत यासाठी सोशल मिडियातून आवाहन केल्यानंतर कल्याण येथील उज्वल थोरे यांनी उंबरधे शाळेतील मुलांसाठी मराठी,इंग्रजी व हिंदीतील गोष्टींची 13 पुस्तकांची भेट दिली.हे ऊर्जादायी आहे आमच्यासाठी.

        दुपारच्या सुट्टीनंतर वाचकांची शाळा भरली.आपल्या आवडीची पुस्तके अन् आज मुलांच्या हाती नवीन पुस्तक आल्याने मुलांमध्ये नव्याचे आकर्षण होते.प्रकट वाचन अन् मौन वाचनाचं महत्त्व सांगण्यात आल्याने मुलं आपल्या आवडीने पुस्तक वाचू लागलेत.सहजच पूर्ण गोष्टींचं पुस्तक वाचण्याचं आव्हान त्यांना देण्यात आलं.

         आव्हान दिल्याने पटकन मुलांनी आपापल्या वाचनाच्या जागा घेतल्या.आव्हान स्विकारण्याची क्षमता अन् ती पूर्ण करण्यासाठी तयार करावी लागणारी सकारात्मक ऊर्जा सतत मुलांमध्ये निर्माण होण्यासाठी असे लहान लहान प्रयोग खूप महत्त्वाचे असतात.

          मुलांना वाचनाचं आव्हान दिल्यानंतर मुलांनी आपल्या क्षमतेनुसार गोष्टी वाचल्यात.काहींनी पुस्तकातील चित्रांची सैर केली.एकमेकांत संवाद घडला.यात सृष्टीने आपले आव्हान पूर्ण करतांना हाती आलेले 'रंगतदार गोष्टी' हे पुस्तक पूर्ण वाचून काढले.वाचलेल्या गोष्टीतला मजकूर सहज आपल्या भाषेत सांगितला.समजपूर्वक वाचनही झालं होतं.तिचं कौतुक व्हावं म्हणून  मुख्याध्यापक शांताराम मोरे सर यांनी बक्षीस म्हणून 'स्मार्ट हॕन्ड रायटिंग' नोटबुक तिला भेट दिली.शाबासकी दिली.मुलांनी टाळ्या वाजवून कौतुक केले.'सेल्फी विथ सक्सेस' मिळाली.

            मुलांना गोष्टी ऐकायला,पहायला अन् वाचायला आवडतात.आज मुलांमध्ये नवा आत्मविश्वास आज निर्माण झाला होता.मुलांमध्ये आज अंतःप्रेरणा निर्माण झाली होती.स्वतः शिकण्याची प्रवृत्ती अन् आतून ऐकणं काय असतं हे त्यांना समजलं होतं.मुलं ही सतत आव्हानं स्विकारण्यासाठी तयार असतात त्यांना त्यांच्या क्षमतेचं आव्हान दिल्यानंतर ते स्वतः त्यात सहभागी होऊन शिकत असतात.पाठ्यपुस्तकांच्या पलिकडचं शिक्षण त्यांना वेळोवेळी हवं असतं,ते त्यांना उपलब्ध करणं आपलं काम.आज उज्वल थोरे दादा यांची पुस्तकरुपी भेट मुलांमध्ये आव्हान स्विकारण्याची 'स्व जाणीव' निर्माण करून गेली.

प्रेरक आहात..!

प्रेरणा द्या,प्रेरणा घ्या..!

@गिरीजादूत

9665911657






Friday, August 18, 2023

वाचकांची शाळा

 वाचकांची शाळा

     वाचकांची शाळा? वाचतांना थोडं वेगळं वाटेलच.पुस्तकांचं गाव,आमचे ग्रंथालय,आमची पुस्तके,पुस्तकांचं हॉटेल असलं काही वाचनात आलं असेलही परंतू 'वाचकांची शाळा' निर्माण करणं ही आमची गरज वाटली अन् आमच्या उंबरधे शाळेचे मुख्याध्यापक श्री.शांताराम मोरे सर यांच्या वाढदिवसानिमित्त बालकांना वाचनाची आवड निर्माण व्हावी,त्यांना सहज अन् सदैव वाचनास पुस्तकं उपलब्ध व्हावी यासाठी उपयुक्त ठरतील असे बालसाहित्याची चित्रमय, गाणी,गोष्टी,ॲक्टिव्हिटीज्,डिक्शनरी,जनरल,नॉलेज,व्याकरण इ.विविध उपयुक्त अडीच हजारांची पुस्तके मुलांसाठी विकत घेत हा नवा उपक्रम हाती घेतलाय.

       'वाचकांची शाळा' मुलांना सहज आवडीची पुस्तके उपलब्ध करून देणार आहे.मुलांना सहज पुस्तके वाचायला मिळणार आहेत.वैयक्तिक तसेच सामुहिक वाचन या निमित्ताने घडणार आहे.उपलब्ध असलेली अन् नसलेली पुस्तके पुन्हा नव्याने मुलांच्या हातात पडणार आहेत.मुलं वाचती झाली म्हणजे अध्ययन अध्यापन करणे सोपे जाणार आहे.वाचनाचं महत्त्व या निमित्तानं मुलांना समजणार आहे.

      काल हा नवा उपक्रम हाती घेतल्याने हाती आलेल्या पुस्तकांतून मुलांना खूप आनंद झालाय.'हर रोज नया कुछ मिलता है' ची सकारात्मक भावना त्यांच्यात निर्माण झालीय.पाठ्यक्रम व्यतिरिक्त दुसरी पुस्तके जी कधी पाहिलीही नाहीत,असंही असतं...हे पुस्तकातलं जगणं त्यांनी अनुभवावं यासाठी 'वाचकांची शाळा' हा उपक्रम मुलांमध्ये नवी वाचनाची ऊर्जा निर्माण करणार आहे.

        वाढदिवसाच्या निमित्तानं मुलांना कायम स्वरुपी वाचनासाठी पुस्तकं उपलब्ध व्हावी,वाचक घडावा ही प्रामाणिक भावनाच प्रेरक आहे."पुस्तकांचं जग" अनुभवण्यासाठी "वाचकांची शाळा" निश्चितच दिशादायी ठरणार आहे.

प्रेरक आहात..!

प्रेरणा द्या,प्रेरणा घ्या..!

@गिरीजादूत

9665911657

(टीप - 'वाचकांची शाळा' या उपक्रमास बळ देण्यासाठी आपल्याकडे उपलब्ध असलेली जुनी नवी पुस्तके आपणही आमच्या मुलांना वाचनासाठी उपलब्ध करून देऊ शकता.आपले योगदान बहुमोल असेल.)












Wednesday, August 16, 2023

तंत्रस्नेही रचनावादी दसरा

 परिसरातील पाने, फुले, खडी वापरून मुलांनी "Happy Dasara" अशी अक्षररचना केली. या उपक्रमातून मुलांची कल्पकता आणि कलात्मकता वाढली. नै...